Flokkur fólksins hefur verið í ríkisstjórn í þrjá mánuði og hefur þegar slegið einhvers konar met í fjölda skandala sem komið hafa upp á þeim tíma. Hvað verður það eiginlega næst? Flokkurinn hóf þátttöku sína í ríkisstjórn með því að gefa upp á bátinn nánast öll helztu stefnumál sín. Þar á meðal skattlausa lágmarksframfærslu upp á 450 þúsund krónur á mánuði sem flokksformaðurinn Inga Sæland sagði fyrir kosningar að væri skilyrði fyrir þátttöku í ríkisstjórn.
Flokkur fólksins gaf að sama skapi upp á bátinn til dæmis andstöðu sína við það að stefnt væri að inngöngu í Evrópusambandið, andstöðu sína við bókun 35 við EES-samninginn og andstöðuna við sölu á hlut ríkissins í Íslandsbanka. Síðan kom styrkjamálið til sögunnar þar sem flokkurinn hafði þegið ríkisstyrki árum saman án þess að uppfylla lagaleg skilyrði þess og skráning lögheimilis Eyjólfs Ármannssonar, þingmanns hans og samgönguráðherra, á eyðibýli á Vestfjörðum.
Formaðurinn varð síðan uppvís að því að hóta skólameistara Borgarholtsskóla lögreglunni vegna týnds skópars barnabarns síns og Ragnar Þór Ingólfsson, þingmaður flokksins, reyndist hafa fengið um tíu milljóna króna biðlaun í eingreiðslu frá VR eftir að hann hóf störf á Alþingi sem hann sagðist ætla að setja í varasjóð. Nýverið lýsti Ásthildur Lóa því síðan yfir að ekki væri hægt að treysta réttarkerfinu á Íslandi og reyndist nú síðast hafa átt barn með 16 ára dreng á sínum tíma.
Hér hefur verið hlaupið hratt yfir sögu og alls ekki um tæmandi upptalningu að ræða. Vert er að árétta að allt þetta og fleira til hefur einungis átt sér stað á þeim þremur mánuðum sem ríkisstjórn Kristrúnar Frostadóttur hefur setið. Hvað verður það næst eins og áður segir? Hvernig verður það sem eftir er af kjörtímabilinu sem er tiltölulega nýhafið? Hversu langt sem það verður. Hins vegar segja gárungarnir að fyrir fjölmiðlana komi jólin nú reglulega í boði Flokks fólksins.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Stjórnarráðshúsið. Eigandi: Hjörtur J. Guðmundsson)