Væntanlega má meðal annars þakka vinnu starfsmanna utanríkisráðuneytisins að undanförnu, við að árétta það við bandarísk stjórnvöld að Ísland sé ekki í Evrópusambandinu, að lagður hafi verið 10% lágmarkstollur á útfluttar íslenzkar vörur til Bandaríkjanna, líkt og í tilfelli aðeins fimm annarra ríkja, en ekki 20% eins og í tilfelli ríkja sambandsins.
Hefði Ísland þannig verið í Evrópusambandinu væri tollur á Ísland nú 20% en ekki 10%. Um beinan ávinning af veru landsins utan sambandsins er að ræða. Þess má einnig geta að Bretland, sem yfirgaf Evrópusambandið árið 2020, fær einnig á sig 10% lágmarkstollinn en byggi nú að sama skapi við 20% hefðu Bretar ekki ákveðið að segja skilið við það.
„Þetta þýðir að góðu fréttirnar fyrir Ísland er að það er lagður tíu prósent tollur á vörur frá Íslandi á meðan að tollur til dæmis á vörur frá Evrópusambandinu er tuttugu prósent og fimmtán prósent frá Noregi. Við sjáum líka miklu hærri tölur í öðrum löndum,“ er haft eftir Sigurði Hannessyni, framkvæmdastjóra Samtaka iðnaðarins, á fréttavef Vísis.
Tollarnir komi þannig hlutfallslega betur við Ísland en mörg önnur ríki að sögn Sigurðar. Bandaríkin séu mikilvægur og vaxandi markaður fyrir landið og útflutningur á íslenzkum vörum þangað verið að aukast. „Það er allavega mjög jákvætt að við erum í lægsta mögulega tolli. Eigum við ekki að segja að þetta kemur eins vel við okkur og hægt er.“
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Fáni Evrópusambandsins. Eigandi: Hjörtur J. Guðmundsson)