Haft var eftir Þorgerði Katrínu Gunnarsdóttur, utanríkisráðherra og formanni Viðreisnar, í samtali við mbl.is í gær að sá 10% lágmarkstollur sem stjórnvöld í Bandaríkjunum hafa lagt á Ísland gæti orðið högg fyrir íslenzkan sjávarútveg. „Það sem skiptir máli er að skoða hvaða áhrif þetta hefur á sjávarútveginn, fiskafurðir. Bandaríkin, sérstaklega fyrir ferskan fisk, eru alveg gríðarlega mikilvæg fyrir okkur og það er stór hluti af okkar útflutningsmarkaði.“
Hanna Katrín Friðriksson, matvælaráðherra og þingmaður Viðreisnar, sagði að sama skapi við Vísi í gær að mikið væri í húfi fyrir íslenzkt atvinnulíf. „Við erum að rýna þessar tölur. Hvort, og þá hvernig, áhrif þetta hefur á sjávarútveginn okkar. Við erum mjög stór í útflutningi til Bandaríkjanna.“ Verðmæti íslenzks útflutnings á sjávarafurðum til Bandaríkjanna á síðasta ári nam um 46 milljörðum króna. Tíu prósent tollur í þeim efnum myndi gera 4,6 milljarða.
Hins vegar hefur ríkisstjórnin á sama tíma ákveðið að tvöfalda veiðigjald á útgerðir hér á landi. Hækkunin nemur 8-10 milljörðum króna á ári. Með öðrum orðum má segja hærri veiðigjöld feli í sér tvöfalt meira högg fyrir sjávarútveginn en tollar Bandaríkjastjórnar. Fyrirtækin þurfa hins vegar ekki að greiða tollana sjálf eins og hærri greiðslur til ríkissjóðs þó þeir geti haft í för með sér minni útflutningstekjur. Hljóð og mynd fer hér alls ekki saman.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Utanríkisráðuneytið. Eigandi: Hjörtur J. Guðmundsson)