Viðbrögð forystumanna Flokks fólksins hafa iðulega verið á sömu nótum þegar vakin hefur verið athygli á breyttum málflutningi flokksins í fjölmörgum málum eftir að hann tók sæti í ríkisstjórn. Hvort sem það hefur varðað inngöngu Íslands í Evrópusambandið, bókun 35 eða sölu á hlut ríkisins í Íslandsbanka svo fátt eitt sé nefnt. Viðkvæðið hefur einfaldlega verið það að nú væri Flokkur fólksins í ríkisstjórn og þá skipti engu máli hvað sagt hafi verið fyrir kosningarnar.
Hið sama var raunin hjá Sigurjóni Þórðarsyni, þingmanni Flokks fólksins, í umræðum sem fram fóru á Alþingi í gær um áform ríkisstjórnarinnar um að selja hlut ríkisins í Íslandsbanka á næstu vikum en flokkurinn hafði fyrir kosningar alfarið hafnað því og sagt að þar með væri verið að fórna gullgæs. Tilefnið var ræða Sigurðar Inga Jóhannssonar, formanns Framsóknarflokksins, sem rifjaði upp þennan breytta málflunting sem Sigurjón kaus að kalla pólitískt spaug eða kerskni.
„Hin svokölluðu kosningaloforð eru viljayfirlýsingar þeirra sem leggja þau fram,“ sagði Inga Sæland, félagsmálaráðherra og formaður Flokks fólksins, í pistli í Morgunblaðinu 30. desember síðastliðinn, einungis mánuði eftir þingkosningarnar, þá komin í ríkisstjórn. Fáir aðrir stjórnmálaflokkar hafa gagnrýnt aðra flokka jafn mikið fyrir það að hafa ekki staðið við kosningaloforð á liðnum árum. Fáir flokkar hafa að sama skapi hlaupið jafn hressilega frá eigin kosningaloforðum.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Alþingishúsið. Eigandi: Hjörtur J. Guðmundsson)