Drög að skýrslu sem samin voru af embættismanni í utanríkisráðuneytinu í ráðherratíð Guðlaugs Þórs Þórðarsonar um örlög umsóknar Íslands um inngöngu í Evrópusambandið en aldrei birt eða samþykkt af ráðherranum enduðu af einhverjum ástæðum í höndum fréttamanna Ríkisútvarpsins sem síðan buðu honum í viðtal og hermdu drögin upp á hann.
Drögin lýsa hins vegar ekki öðru en afstöðu embættismannsins til málsins sem hafði jafnvel ritað formála að skýrslunni í nafni Guðlaugs Þórs. En hvernig vissu fréttamennirnir um drögin? Fram kom í fréttum Ríkisútvarpsins að óskað hefði verið eftir drögunum, innanhússkjali í ráðuneytinu, á grundvelli upplýsingalaga. En fyrst hefði þurft að vita af tilvist þess.
Vitanlega skiptir birting draganna engu enda lýsa þau sem fyrr segir einungis sjónarhóli viðkomandi embættismanns til málsins og mögulega einhverra samstarfsmanna hans. Hins vegar má ljóst vera að vitneskjan um tilvist þeirra hafi skilað sér í hendur fréttamanna Ríkisútvarpsins innan úr utanríkisráðuneytinu. Væntanlega frá einhverjum embættismönnum þess.
Mögulega er um að ræða sömu embættismennina og fullvissuðu forvera Guðlaugs Þórs í utanríkisráðuneytinu, Gunnar Braga Sveinsson, ásamt embættismönnum Evrópusambandsins um að bréfið sem hann sendi til Brussel árið 2015, og þeir sömdu drögin að, fæli í sér að umsóknin væri dregin til baka. Sem þeir síðan sögðu þvert á móti að hefði ekki verið raunin.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Utanríkisráðuneytið. Eigandi: Hjörtur J. Guðmundsson)