Fróðleg skoðanakönnun var gerð í Bretlandi í júlí af fyrirtækinu YouGov þar sem spurt var um afstöðu fólks til þess að ganga aftur í Evrópusambandið ef það þýddi að Bretar yrðu að verða hluti af Schengen-svæðinu og taka upp evruna. Á meðan landið var innan sambandsins var það utan svæðisins og hélt enn fremur í brezka pundið sem sjálfstæðan gjaldmiðil sinn.
Meirihluti þeirra sem tóku afstöðu til spurningarinnar vildi ekki að Bretland yrði aftur hluti af Evrópusambandinu upp á þessi kjör en niðurstöður skoðanakannana hafa annars undanfarin misseri ýmist sýnt fleiri hlynnta því að ganga aftur þar inn eða ekki. Ekki sízt eftir orðalagi spurningarinnar. Þannig sögðust 45% andvíg því en 36% hlynnt. Aðrir voru óákveðnir.
Hins vegar hafa niðurstöður skoðanakannana bent til þess að margir séu ekki sáttir við það með hvaða hætti staðið var að útgöngunni úr Evrópusambandinu en ekki endilega við útgönguna sjálfa. Þannig hafa kannanir bent til þess að fleiri séu hlynntir útgöngunni ef staðið væri rétt að henni og þau tækifæri sem henni fylgdu væru þannig raunverulega nýtt.
Við Íslendingar erum hluti af Schengen sem átt hefur stóran þátt í því varnarleysi sem til staðar er á landamærum Íslands. Bretar höfnuðu Schengen hins vegar á sínum tíma þar sem Bretland hefði sem eyja, rétt eins og Ísland, náttúruleg landamæri sem yrði fórnað. Þess má geta að ný ríki Evrópusambandsins þurfa bæði að verða hluti Schengen og taka upp evruna.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Tower Bridge í London, höfuðborg Bretlands. Eigandi: Hjörtur J. Guðmundsson)