„Ég sé enga ástæðu til þess að fresta landsfundi. Það hefur sjaldan verið eins mikilvægt fyrir sjálfstæðismenn að koma saman, ekki síst í kjölfar úrslita nýafstaðinna kosninga sem voru auðvitað vonbrigði fyrir okkur,“ segir Diljá Mist Einarsdóttir, þingmaður Sjálfstæðisflokksins, í samtali við Vísi í dag vegna hugmynda sem viðraðar hafa verið um að fresta landsfundi flokksins sem til stendur að fari fram um mánaðarmótin febrúar-marz á næsta ári.
Diljá gefur lítið fyrir þann rökstuðning fyrir mögulegri frestun landsfundar að veðurfar gæti sett strik í reikninginn. Það sé nýbreytni að tefla möguleika á vondu veðri fram sem ástæðu til þess. „Ég hef ekki heyrt þessu slengt fram fyrr.“ Áslaug Arna Sigurbjörnsdóttir, þingmaður Sjálfstæðisflokksins, tekur undir með Diljá um að engin ástæða sé til þess að fresta landsfundinum í samtali við Vísi. Það sé þó miðstjórnar flokksins að ákveða það.
Fjallað var upphaflega um málið í frétt Vísis í gær þar sem kom fram að hugmyndin um frestun landsfundarins hafi verið viðruð á fundi formanna málefnanefnda Sjálfstæðisflokksins fyrr í þessum mánuði. Haft var eftir Jens Garðari Helgasyni, formanni atvinnuveganefndar flokksins, að helzta ástæða fyrir þeirri umræðu hafi verið að brugðið gæti til beggja vona varðandi veður og færð seint í febrúar. Heppilegra væri að halda fundinn næsta haust í staðinn.
Málið var einnig gert að umtalsefni í aðsendri grein á Vísi í dag eftir Daníel Hjörvar Guðmundsson, stjórnarmann í Sambandi ungra sjálfstæðismanna, þar sem hann fjallar í gamansömum tón um það að veðurfar eftir rúma tvo mánuði skuli vera sett fram sem rök fyrir hugsanlegri frestun landsfundarins. Hins vegar sé greinilega engin ástæða til þess að örvænta í þeim efnum „því handan við hornið, við enda ganganna sé paradísin sem er hið íslenska haust.“
Haft var eftir Bjarna Benediktssyni, formanni Sjálfstæðisflokksins, í Spursmálum í gær að hann teldi ákveðin rök hníga að því að fresta landsfundinum þó það skipti ekki öllu máli. Mikilvægt væri þó að ljúka samtalinu um það hvort fundurinn færi fram á fyrirhuguðum tíma eða næsta haust. Fyrr í mánuðinum sagði Bjarni í samtali við mbl.is, spurður hvort tímasetning fundarins héldi, að svo yrði: „Já, það var búið að fastsetja hann í lok febrúar, byrjun mars.“
Formaður utanríkismálanefndar Sjálfstæðisflokksins, Andrea Sigurðardóttir, birti færslu á Facebook-síðu sinni í dag þar sem hún brást við umfjöllun um málið. Segir þar, ólíkt því sem Jens Garðar hélt fram, að málið hafi ekki snúizt aðallega um veðurfar heldur þröngan tímaramma fyrir nefndirnar til þess að ljúka störfum. Eftir kosningar hafi verið ljóst að tímalínan væri orðin mjög brött til þess „að standa við alla þá fresti sem skipulagsreglur gera ráð fyrir.“
Fjallað er um skrif Andreu á mbl.is í dag en einnig rætt við Kristófer Má Maronsson, formann efnahags- og viðskiptanefndar Sjálfstæðisflokksins, sem segist ekki styðja það að landsfundi verði frestað fram á haust. Það væri í mesta lagi í nokkrar vikur eða fram á vorið en hann teldi þó enga þörf á að fresta fundinum. Einu haldbæru rökin væru þau að gefa málefnanefndum tíma til að ráðfæra sig við flokksmenn áður en þær sendu miðstjórn drög að ályktunum.
Hitt er svo annað mál að kveðið er einungis á um einn frest í skipulagsreglunum þegar kemur að störfum málefnanefndanna. Að drög að ályktunum liggi fyrir að minnsta kosti einum mánuði fyrir landsfund. Með öðrum orðum eftir rúman mánuð. Væntanlega eru nefndirnar ekki á byrjunarreit í störfum sínum og ættu að hafa tíma til þess að ljúka við drögin ef þeirri vinnu er ekki þegar lokið og halda í framhaldinu opna fundi um þau með flokksmönnum.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Merki Sjálfstæðisflokksins. Eigandi: Hjörtur J. Guðmundsson)