Fyrir rúmum fimm vikum síðan sendi Gallup út skoðanakönnun þar sem spurt var að því hvernig fólk myndi greiða atkvæði í þjóðaratkvæði um það hvort hefja ætti nýtt umsóknarferli að Evrópusambandinu. Spurningin var svohljóðandi: „Ef gengið yrði til kosninga í dag um framhald viðræðna um aðild Íslands að Evrópusambandinu, hvernig er líklegast að þú myndir kjósa?“ Orðalagið „framhald viðræðna“ bendir vitanlega til þess að sá sem lét gera könnunina sé sjálfur hlynntur því að gengið verði í sambandið. Frá því er skemmst að segja að niðurstöður hennar hafa ekki enn verið birtar.
Fleira var spurt um í skoðanakönnuninni. Þar voru tvær aðrar spurningar. Spurt var annars vegar að því hverjar væru helztu ástæður þess að fólki myndi annars vegar kjósa með „framhaldi viðræðna“ við Evrópusambandið og hins vegar gegn því. Fyrr í sumar, nánar tiltekið í júlí, gerði Maskína könnun þar sem spurt var um afstöðu fólks til inngöngu í sambandið. Þær niðurstöður hafa sömuleiðis ekki enn verið birtar. Vitanlega er þeim sem kaupa kannanir frjálst að birtar niðurstöður þeirra eða ekki. Hins vegar má ljóst vera að sé sú ekki raunin hafi þær valdið viðkomandi aðilum vonbrigðum.
Vert er að rifja það enn fremur upp að fyrir rúmu ári gerði Maskína könnun fyrir Evrópuhreyfinguna þar sem spurt var að því hvaða áhrif áherzla á inngöngu í Evrópusambandið hefði á það með hvaða hætti kjósendur verðu atkvæði sínu. Hvort stuðningur við málið væri ávísun á meiri stuðning eða minni. Niðurstöðurnar voru að sama skapi aldrei birtar. Hins vegar gerðist það síðan fyrir þingkosningarnar í lok nóvember að innganga í sambandið var aldrei þessu vant ekki hluti af kosningastefnu Viðreisnar og lagði flokkurinn enga áherzlu á málið í aðdraganda þeirra.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Fáni Evrópusambandsins. Eigandi: Hjörtur J. Guðmundsson)