Haft var eftir Margréti Kristínu Pálsdóttur, lögreglustjóra á Suðurnesjum, á fréttavef Vísis á dögunum, í tengslum við það hvort Mohamad Kourani, sem nú kallar sig Mohamad Th. Jóhannessonar, kynni að snúa aftur til Íslands þrátt fyrir fyrirhugað endurkomubann, að hafa yrði í huga að vegna aðildar Íslands að Schengen-svæðinu væri ekkert persónubundið landamæraeftirlit gagnvart öðrum ríkjum innan þess. Það þurfi sem sagt ekki að framvísa vegabréfum.
Viðtalið var tekið í kjölfar þess að Helgi Magnús Gunnarsson, fyrrverandi vararíkissaksóknari, benti á það í samtali við Vísi að engin trygging væri fyrir því að Kourani sneri aftur til Íslands. Hann þyrfi ekki annað en að breyta einum staf í nafninu sínu enda þyrfti ekki að framvísa vegabréfum við komuna til landsins frá öðrum ríkjum innan Schengen-svæðisins en fyrir liggur að einkum ytri mörk þess í Austur-Evrópu eru hriplek og fjöldi fólks sem kemst þar ólöglega inn á svæðið.
Farþegalistar vegna flugs frá öðrum ríkjum innan Schengen-svæðisins, sem ætlast er til að flugfélög sem fljúgi til landsins skili til hérlendra yfirvalda, eru ekki staðfestir með vegabréfum heldur er einungis um að ræða þær upplýsingar sem farþegar gefa upp þegar keyptir eru farmiðar. Flugfélögin safna þessum upplýsingum í viðskiptalegum tilgangi en ekki með tilliti til öryggismála. Fyrir vikið er nánast hægt að gefa upp hvaða nafn sem er við kaup á flugmiða til Íslands.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Frá Keflavíkurflugvelli. Eigandi: Jeff Hitchcock – Creative Commons Attribution 2.0 Generic)