Fyrrverandi seðlabankastjóri Evrópusambandsins, Mario Draghi, lét þau orð falla á fjölmennum fundi í Rimini á Ítalíu í lok ágúst að þjóðríki Evrópu væru „úreld“ og að eina leiðin fyrir sambandið til þess að lifa af í heimi stórvelda væri að það yrði endanlega að Bandaríkjum Evrópu. Greint var frá ummælum Draghis á ítalska fréttavefnum The Olive Press. Þar segir að þó Draghi gegni ekki lengur formlegu embætti sé hann ein af áhrifamestu röddunum innan Evrópusambandsins.
„Þjóðríkin í Evrópu eru úreld. Við verðum að stefna að Bandaríkjum Evrópu til þess að tryggja aðkomu okkar og öryggi,“ sagði Draghi. Frá upphafi hefur evrópskt sambandsríki verið lokamarkmiðið með samrunaþróuninni innan Evrópusambandsins og forvera þess og hefur það síðan jafnt og þétt öðlast fleiri einkenni ríkis. Þar á meðal hæstarétt, löggjafarþing, seðlabanka, gjaldmiðil, skilgreind ytri landamæri, ríkisborgararétt, vegabréf, utanríkisþjónustu og jafnvel ökuskírteini.
Fram kom í Schuman-ávarpinu 1950, sem markaði upphaf samrunaþróunarinnar innan Evrópusambandsins og forvera þess, að fyrsta skrefið væri að kola- og stálframleiðsla Evrópuríkja færi undir eina stjórn en lokaskrefið evrópskt sambandsríki. Franski diplómatinn Jean Monnet, sem gjarnan hefur verið nefndur faðir sambandsins öðrum fremur, segir enn fremur í ævisögu sinni að stefnt hafi verið að Bandaríkjum Evrópu frá upphafi og vann hann ötullega að því markmiði.
Hrein leitun hefur verið að forystumönnum innan Evrópusambandsins á liðnum árum sem ekki hafa stutt lokamarkmiðið um sambandsríki. Til að mynda allir forsetar framkvæmdastjórnar þess undanfarna áratugi. Einn sá ötulusti er Guy Verhofstadt, forseti European Movement International, sem var heiðursgestur á landsþingi Viðreisnar um liðna helgi. Þar gekk hann hann enn lengra og kallaði eftir evrópsku heimsveldi. Var ræðunni fagnað með standandi lófataki.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Mario Draghi, fyrrverandi seðlabankastjóri Evrópusambandsins. Eigandi: Andrej Klizan)