Myndrit frá Evrópusambandinu berst nú á milli stuðningsmanna inngöngu Íslands í sambandið á samfélagsmiðlum sem unnið er upp úr niðurstöðum skoðanakönnunar sem gerð var fyrir það síðasta vor. Þar segir að 73% íbúa ríkja Evrópusambandsins telji heimaríki sín hafa haft hag af verunni í sambandinu. Hins vegar er fleira að finna í niðurstöðunum sem greinilega hefur ekki þótt ástæða til að vekja athygli á enda ekki um að ræða eins hagstæðar upplýsingar fyrir málstaðinn.
Til að mynda kemur fram í niðurstöðum umræddrar skoðanakönnunar að fleiri íbúar ríkja Evrópusambandsins telji það ekki vera á réttri leið eða 43% á móti 42%. Hafa fleiri verið þeirrar skoðunar frá því að byrjað var að spyrja um það fyrir rúmum áratug síðan. Þannig telja til dæmis 56% Frakka sambandið ekki vera á réttri leið en 25% að svo sé, 49% Finna telur það á rangri leið en 32% eru því ósammála og 47% Þjóðverja eru enn fremur þeirrar skoðunar en 40% ósammála.
Mun fleiri íbúar ríkja Evrópusambandsins telja að sama skapi að lífskjör þeirra muni versna á næstu fimm árum en þeir sem telja að þau aukist eða 27% á móti 15%. Flestir telja að þau muni standa í stað eða 55%. Til að mynda telja 46% Frakka að lífsgæði þeirra versni en 12% að þau muni batna, 40% Belga á móti 14%, 37% Þjóðverja á móti 14% og 31% íbúa Lúxemborgar á móti 14%. Með öðrum orðum segir spurningin sem minnzt er á í upphafi ekki nema hluta sögunnar.
Við hæfi er síðan að rifja það upp að samkvæmt skoðanakönnun fyrir Evrópusambandið árið 2013 töldu 70% íbúa ríkja þess spillingu þrífast innan stofnana sambandsins. Þar af 84% aðspurðra í Svíþjóð, 82% í Þýzkalandi og 80% í Austurríki. Hliðstætt hafði komið fram árin á undan. Viðbrögð sambandsins við þessu voru þau að hætta einfaldlega að láta spyrja um spillingu í stofnunum sambandsins á þeim forsendum að almenningur vissi ekki hvað hann væri að tala um.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Fáni Evrópusambandsins. Eigandi: Hjörtur J. Guðmundsson)