Mánudagskvöldið 22. september var greint frá því að óþekktir drónar hefðu sést við Kastrup-flugvöll í Kaupmannahöfn. Síðar sama kvöld gerðist það sama við Gardemoen-flugvöll í Ósló. Strax daginn eftir kallaði Guðrún Hafsteinsdóttir, formaður Sjálfstæðisflokksins, eftir því að Inga Sæland, starfandi forsætisráðherra og formaður Flokks fólksins, kallaði saman þjóðaröryggisráðið. Inga tók undir það að tilefni væri til þess en varð þó ekki við þeirri hvatningu.
Kristrún Frostadóttir, forsætisráðherra og formaður Samfylkingarinnar, og Þorgerður Katrín Gunnarsdóttir, utanríkisráðherra og formaður Viðreisnar, voru þá staddar í New York. Þorgerður sagði á þriðjudeginum, fyrir viku, að hún teldi ekki skipta máli hvort þjóðaröryggisráðið yrði kallað saman nokkrum dögum fyrr eða seinna en tók undir það að tilefni væri til þess. Sagði hún tilefni til þess við heimkomu þeirra Kristrúnar. Þær virðast þannig ekki hafa treyst Ingu til þess.
Kristrún boðaði loksins í dag til fundar í þjóðaröryggisráðinu sem fer þó ekki fram fyrr en á föstudaginn. Einungis er þó um reglubundinn fund að ræða. Þá verða meira en tíu dagar liðnir frá atburðunum við Kastrup og Gardemoen. Í kjölfarið urðu fleiri tilfelli í Danmörku og Noregi auk þess sem vart hefur orðið við óþekkta dróna við Keflavíkurflugvöll að undanförnu. Hvorki var þó að mati forsætisráðherra tilefni til þess að funda fyrr né sérstaklega vegna þessara atburða.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Kristrún Frostadóttir forsætisráðherra. Eigandi: © European Union, 2025, CC BY 4.0)