„Markmið mitt er Bandaríki Evrópu, mótuð eftir sambandsríkjum eins og Sviss, Þýzkalandi eða Bandaríkjunum,“ sagði Ursula von der Leyen, forseti framkvæmdastjórnar Evrópusambandsins, við þýzka vikublaðið Der Spiegel í ágúst 2011 en hún gegndi þá embætti félags- og atvinnumálaráðherra Þýzkalands fyrir hönd Kristilegra demókrata.
Von der Leyen hefur tjáð sig með hliðstæðum hætti við ýmis tilefni í gegnum tíðina. Til dæmis í samtali við þýzka vikublaðið Die Zeit í júní 2016, þá orðin varnarmálaráðherra Þýzkalands, þar sem hún endurtók ákall sitt eftir Bandaríkjum Evrópu og bætti við að hún sæi fyrir sér börnin sín eða barnabörn búa í evrópsku sambandsríki í framtíðinni.
Hins vegar lenti von der Leyen í vanda þegar hún var í framboði til forseta framkvæmdastjórnar Evrópusambandsins árið 2019. Hún naut ekki afgerandi stuðnings stærstu þingflokkanna á þingi sambandsins og varð því að reiða sig á flokka sem gagnrýnir eru á það. Til að tryggja sér stuðning þeirra kaus hún að draga í land í þessum efnum.
Velkjast þarf hins vegar ekki í miklum vafa um að skoðanir von der Leyens séu óbreyttar þó hún hafi neyðst til þess að segja annað til þess að ná kjöri. Raunar hefur leitun verið að forystumanni innan Evrópusambandsins og ríkja þess á liðnum áratugum sem ekki hefur verið hlynntur lokamarkmiðinu innan sambandsins frá upphafi um sambandsríki.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Ursula von der Leyen, forseti framkvmdastjórnar Evrópusambandsins. Eigandi: Gov.si)