„Ég þrái minni verðbólgu fyrir mitt eldhús og ég heyri að fólk er að tala um það sama hvert sem ég kem. Á meðan að þetta er staðan á Íslandi þá getur ekki verið lausnin og kemur ekki til greina að ætla að hækka skatta á vinnandi fólk og lítil og meðalstór fyrirtæki. Við ætlum að koma jafnvægi á efnahagsmálin með því að sýna heilbrigða skynsemi og forgangsröðun og ná verðbólgunni niður. Við getum gert betur og Viðreisn ætlar að gera betur. Breytum þessu saman.“
Með þessum hætti komst Þorbjörg Sigríður Gunnlaugsdóttir, þingmaður Viðreisnar og núverandi dómsmálaráðherra, að orði í kosningamyndbandi flokksins sem birt var í nóvember 2024 í aðdraganda síðustu þingkosninga. Ljóst er að sumt eldist alveg einstaklega illa. Verðbólgan mældist 4,5% í desember en var 4,6% í fyrstu mælingunni eftir að ríkisstjórnin tók við völdum, í janúar á síðasta ári. Greiningadeildir bankanna spá því að hún verði í kringum 5% næstu mánuðina.
Flest sem ríkisstjórnin hefur gert hefur frekar verið til þess fallið að auka verðbólguna en hitt. Ekki sízt einmitt miklar skattahækkanir sem ráðherrar kjósa að kalla öðrum nöfnum eins og leiðréttingu og uppfærslu á gömlum kerfum. Þær takmörkuðu vaxtalækkanir sem þó hafa átt sér stað í valdatíð hennar hafa einkum verið rökstuddar af Seðlabankanum með versnandi efnahagshorfum. Hvað varð um það að hækka ekki skatta og negla niður verðbólguna?
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Stjórnarráðshúsið. Eigandi: Hjörtur J. Guðmundsson)