Væntanlega sakna fáir síðasta ríkisstjórnarsamstarfs. Hins vegar er ljóst að lengi getur vont versnað. Ekki sízt þegar kemur að efnahagsmálunum. Núverandi stjórnarflokkar, Samfylkingin, Viðreisn og Flokkur fólksins, lögðu megináherzlu á það fyrir síðustu þingkosningar að ná niður verðbólgu og skapa þannig forsendur fyrir lækkun vaxta. Hins vegar er verðbólgan nú meiri en hún var þegar stjórnin tók við völdum. Fyrst og fremst vegna framgöngu hennar sjálfrar.
Verðbólgan á ársgrundvelli dróst saman um 3,2% síðustu tólf mánuðina sem fyrri ríkisstjórn var við völd áður en hún varð starfsstjórn. Verðbólgan jókst hins vegar um 0,6% á fyrstu tólf mánuðum núverandi ríkisstjórnar. Ríkisstjórnar Kristrúnar Frostadóttur, formanns Samfylkingarinnar, sem hét því fyrir kosningarnar í frægu, eða ef til vill alræmdu, kosningamyndbandi að negla niður vextina og henti um leið gaman að árangri þáverandi stjórnar í þeim efnum.
Fyrir vikið er varla að furða að sífellt fleiri velti því fyrir sér hvort ríkisstjórnin sé viljandi að stuðla að meiri verðbólgu til þess að auka líkurnar á inngöngu í Evrópusambandið í ljósi þjóðaratkvæðisins sem fyrirhugað er í þeim efnum. Ekki sízt í ljósi afleitrar stöðu efnahagsmála innan sambandsins. Betra efnahagsástand hér á landi auki þannig ekki líkurnar á því að fólk vilji ganga í Evrópusambandið. Það hentar ekki pólitískum hagsmunum flokka sem vilja ganga í það.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Stjórnarráðshúsið. Eigandi: Hjörtur J. Guðmundsson)