„Við verðum að draga verulega úr skriffinnsku í Evrópusambandinu,“ sagði Friedrich Merz, kanzlari Þýzkalands, í ræðu á fundi Alþjóðaefnahagsráðsins (World Economic Forum) í Davos í síðustu viku sem vakti mikla athygli. Aðallega fyrir það hversu opinskrátt orðalagið var. Hins vegar hafa forystumenn innan sambandsins ítrekað lýst því yfir á liðnum árum og áratugum að til stæði að draga úr regluverki þess en árangurinn til þessa hins vegar verið lítill eða enginn.
„Innri markaðinum [Evrópusambandsins] var ýtt úr vör á sínum tíma með það að markmiði að skapa samkeppnishæfasta efnahagssvæði í heimi. Í staðinn erum við orðin heimsmeistarar í of miklu reglugerðafargani. Því verður að linna,“ sagði Merz. „Bæði Þýzkaland og Evrópusambandið hafa sólundað gríðarlegum tækifærum fyrir vöxt á undanförnum árum með því að draga lappirnar varðandi umbætur og skerða óhóflega frumkvöðlafrelsi og persónulega ábyrgð.“
Margar tilraunir hafa verið gerðar í gegnum tíðina til þess að auka samkeppnishæfni Evrópusambandsins en þróunin yfirleitt verið í öfugar áttir. Tvær umfangsmiklar skýrslur sem unnar voru fyrir sambandið á árinu 2024 í þeim efnum, annars vegar af Mario Draghi, fyrrverandi seðlabankastjóra þess, og hins vegar Enrico Letta, fyrrverandi forsætisráðherra Ítalíu, drógu upp afar dökka mynd í þeim efnum. Hvort eitthvað meira gerist nú frekar en áður kemur í ljós.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Friedrich Merz, kanzlari Þýzkalands. Eigandi: Steffen Prößdorf)