„Reglur ESB sem slíkar (einnig þekktar sem acquis) eru ekki umsemjanlegar; þær verður að innleiða og hrinda í framkvæmd af umsóknarríkinu. Inngönguviðræður snúast fyrst og fremst um að ná samkomulagi um það hvernig og hvenær umsóknarríkið mun taka upp allar reglur og verklagsreglur ESB og hrinda þeim í framkvæmd með árangursríkum hætti.“
Með þessum hætti hljómar svar sem Svavar Alfreð Jónsson, fyrrverandi sóknarprestur á Akureyri, fékk frá upplýsingaveitu Evrópusambandsins á sínum tíma þegar hann óskaði eftir nánari skýringum á eðli viðræðna við sambandið vegna umsóknar nýrra ríkja um inngöngu í það og enn fremur hvort þau „ættu kost á að fá undanþágur frá lagabálki ESB.“
Svavar fjallaði um málið á Facebook á dögunum. Sagðist hann hlynntur fyrirhuguðu þjóðaratkvæði um Evrópumálin en þá væri mikilvægt að fram færi upplýst umræða. „Eitt má þó ekki gleymast, í því máli og öðrum, þar sem leitað er eftir vilja þjóðarinnar: Hún verður að vita um hvað málið snýst. Þjóðinni verður líka að treysta fyrir réttum upplýsingum.“
Svarið sem Svavar fékk er í fullu samræmi við þær upplýsingar sem finna má hvað þetta varðar á vefsíðum Evrópusambandsins. Til að mynda á vef stækkunarráðuneytis sambandsins undir fyrirsögninni: „Um hvað er samið?“: „Skilyrði og tímasetningu upptöku, innleiðingar og framkvæmdar á öllum gildandi reglum ESB (acquis).“ Svo mörg voru þau orð.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Fáni Evrópusambandsins. Eigandi: Hjörtur J. Guðmundsson)