Fram að síðustu þingkosningum talaði Inga Sæland, formaður Flokks fólksins, gegn samþykkt frumvarps um bókun 35 við EES-samninginn sem felur í sér forgang innleidds regluverks frá Evrópusambandinu í gegnum samninginn á innlenda lagasetningu. Eftir kosningarnar sagðist hún hins vegar allt í einu hlynnt slíku frumvarpi. Væntanlega þótti fáum þau sinnaskipti trúverðug og að það hafi verið einskær tilviljun að þau hafi verið forsenda þess að fá sæti við ríkisstjórnarborðið.
Fyrir skömmu sagðist Ingibjörg Isaksen, þingflokksformaður Framsóknarflokksins, vera orðin andvíg frumvarpinu um bókun 35 eftir að hafa áður tekið undir málflutning þeirra sem studdu það og beitt sér fyrir því fyrr á árinu að þingmönnum flokksins yrði meinað að beita sér gegn málinu í þinginu. Bar hún við refsitollum Evrópusambandsins í nóvember! Væntanlega er eins tilviljun að málið hafi komist í hámæli á dögunum og Ingbjörg sé í framboði til formanns flokksins.
Hins vegar hefur Lilja Alfreðsdóttir, varaformaður Framsóknarflokksins sem einnig sækist eftir formennskunni, lengi verið andvíg frumvarpinu. Til dæmis lýsti hún þeirri afstöðu sinni í Morgunblaðinu 7. október: „Bókun 35 við EES-samninginn gengur gegn íslenskri lýðræðishefð. Bókun 35 felur í sér að íslensk stjórnvöld viðurkenni forgang EES-réttar fram yfir landslög, sem væri í reynd afsal á löggjafarvaldi Alþingis.“ Bókunin færi þannig gegn ákvæðum stjórnarskrárinnar.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Ingibjörg Isaksen, þingflokksformaður Framsóknarflokksins. Eigandi: Skjáskot af Ruv.is)