Furðuleg tilraun var gerð af Jóhanni Páli Jóhannssyni umhverfisráðherra í Kastljósinu í fyrradag til þess að færa rök fyrir samþykkt boðaðs frumvarps um bókun 35 við EES-samninginn. Tilefnið var sú niðurstaða Héraðsdóms Reykjavíkur að fella úr gildi virkjunarleyfi Hvammsvirkjunar á þeim forsendum að gildandi löggjöf væri ekki nógu ljós ólíkt tilskipun frá Evrópusambandinu sama efnis. Málið undirstrikar einmitt mikilvægi þess að frumvarpið, sem felur í sér að innleitt regluverk frá sambandinu í gegnum samninginn gangi framar löggjöf innlendri að uppruna, verði ekki samþykkt.
Við höfum vitanlega enga tryggingu fyrir því að regluverk frá Evrópusambandinu, sem hingað kemur í gegnum EES-samninginn, henti okkar aðstæðum og hagsmunum enda enginn skortur á dæmum um að svo hafi ekki verið. Sem aftur er ekki einkennilegt þar sem umrætt regluverk er ekki sett með íslenzka hagsmuni og aðstæður í huga. Jafnvel þó Ísland gengi í sambandið myndi sáralítið breytast í þeim efnum enda tæki vægi landsins þar innanborðs fyrst og fremst mið af íbúafjölda landsins. Þá yrði enn fremur allt regluverk Evrópusambandsins undir en ekki einungis sá hluti þess sem fellur undir samninginn.
Verði frumvarpið um bókun 35 samþykkt, sem Flokkur fólksins hyggst að sögn styðja fyrst hann er kominn í ríkisstjórn þrátt fyrir að hafa barizt gegn því fyrir kosningar ekki sízt á þeim forsendum að það færi gegn stjórnarskránni, verður til ný forgangsregla í íslenzkum rétti sem ólíkt fyrri forgangsreglum vegna almennrar lagasetningar, þar sem yngri lög ganga fyrir eldri og sértækari fyrir almennari, mun miðast við það eitt að um sé að ræða innleiðingu á regluverki frá Evrópusambandinu í gegnum EES-samninginn. Regluverk frá sambandinu verður þannig í reynd gert æðra innlendri lagasetningu.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Fánar aðildarrríkja EFTA ásamt fána Evrópusambandsins. Eigandi: EFTA)