Varnarmálaráðherra Evrópusambandsins, Andrius Kubilius, lagði áherzlu á mikilvægi þess að sambandið kæmi sér upp 100 þúsund manna fastaher á öryggismálaráðstefnu í Svíþjóð í janúar. Í kjölfarið lýsti José Manuel Albares, utanríkisráðherra Spánar. yfir stuðningi við það. Hrein leitun hefur verið að forystumönnum innan Evrópusambandsins á undanförnum árum sem ekki hafa lýst yfir stuðningi við það að sambandið komi sér endanlega upp eigin her.
Meðal þeirra sem lýst hafa yfir stuðningi við Evrópusambandsher er Ursula von der Leyen, forsætisráðherra sambandsins, sem og Emmanuel Macron, forseti Frakklands. Evrópusambandið hefur þegar tekið ýmis skref á þeirri leið og hefur þannig til að mynda eigið herráð. Þá eru ákveðnar hersveitir undir sambandið settar sem mannaðar eru af ríkjum þess. Enn er þó um að ræða til þess að gera fámennar sveitir sem einkum er ætlað að sinna friðargæzlu.
Marie-Agnes Strack-Zimmermann, oddviti samtakanna ALDE á þingi Evrópusambandsins, kallaði eftir evrópskum her á þingi samtakanna sem fram fór í lok október á síðasta ári og Pawel Bartoszek, þingmaður Viðreisnar, sat fyrir hönd hans en flokkurinn á aðild að þeim. Yfirskrift þingsins var: „Gerum Evrópusambandið að stórveldi á heimsvísu“. Kallað var enn fremur eftir því af hálfu þingsins að ríki sambandsins töluðu einni röddu í utanríkismálum.
Fyrir ári sendi Valérie Haye, forseti Renew Europe, þingflokks ALDE á þingi Evrópusambandsins, bréf til von der Leyens og Antónios Costa, forseta leiðtogaráðs þess, þar sem sagði meðal annars að tímabært væri að sambandið yrði að stórveldi og kæmi sér upp sjálfstæðum her. Með öðrum orðum má ljóst vera að Viðreisn hafi ekkert á móti því að Evrópusambandið verði endanlega að einu ríki, eins og stefnt hefur verið að frá upphafi, með sinn eigin her.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Þorgerður Katrín Gunnarsdóttir utanríkisráðherra og Andrius Kubilius, varnarmálaráðherra Evrópusambandsins. Eigandi: © European Union, 2025, licensed under CC BY 4.0)