„Ísland verður auðvitað nettógreiðandi inn í Evrópusambandið. Það væri óeðlilegt að eitt ríkasta land í Evrópu myndi einhvern veginn fá meira inn í ríkissjóð út úr aðild en það myndi borga inn,“ sagði Pawel Bartoszek, formaður utanríkismálanefndar Alþingis og þingmaður Viðreisnar, í hlaðvarpinu Lyklavöldin 1. maí í spjalli um sambandið.
Við Íslendingar myndum sannarlega borga mun meira til Evrópusambandsins, færum við þangað inn, en fengist til baka í hvers kyns styrki úr sjóðum þess. Einkum vegna mikilla þjóðartekna. Þar á meðal í landbúnaðar- og byggðastyrki. Einungis er deilt um það hversu marga milljarða eða jafnvel tugi milljarða við myndum greiða með okkur árlega.
Meirihluti ríkja Evrópusambandsins fær hins vegar meira úr sjóðum þess en þau leggja í púkkið eða 17 af 27. Flest gengu þau í sambandið fyrir meira en 20 árum og sér ekki fyrir endann á því hvenær þau fara að greiða meira en þau fá til baka. Verði það einhvern tímann. Við yrðum í félagi við hinar tíu þjóðirnar sem sjá um að greiða reikninginn.
Tíu önnur ríki eru annað hvort samþykkt umsóknarríki eða möguleg umsóknarríki. Komi til inngöngu þeirra í Evrópusambandið munu þau öll að sama skapi fá meira frá sambandinu en þau munu greiða til þess. Á meðal samþykktra umsóknarríkja eru Úkraína og Moldóva. Það er auðvitað ágætt að Pawel gangist við þessari staðreynd málsins.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Pawel Bartoszek, þingmaður Viðreisnar. Eigandi: Skjáskot af Ruv.is)