„Skoðanakannanir í Noregi hafa sýnt frekar stöðugan meirihluta fyrir því að standa utan Evrópusambandsins undanfarna áratugi. Ég efast persónulega um það að þetta myndi hafa mikil áhrif þar sem þetta myndi ekki breyta miklu um það fyrirkomulag sem Noregur hefur við sambandið,“ sagði Varg Lukas Folkman, sérfræðingur hjá hugveitunni European Policy Centre í Brussel og fyrrverandi blaðamaður í Noregi, í samtali við fjölmiðilinn Roundtable á dögunum spurður hvort hann teldi að það myndi hafa áhrif á afstöðu Norðmanna til inngöngu í Evrópusambandið ef Ísland gengi í það.
Fyrr á þessu ári hafnaði mikill meirihluti þingmanna á norska Stórþinginu, 78 gegn 21, þingsályktunartillögu Venstre, systurflokks Viðreisnar, um að ríkisstjórn Noregs hæfi athugun á mögulegri inngöngu landsins í Evrópusambandið. Sömuleiðis var hafnað varatillögu þess efnis að ríkisstjórninni yrði falið að hefja viðræður við sambandið með það að markmiði að tengjast sameiginlegri öryggis- og varnarstefnu þess nánari böndum. Þá var einnig hafnað tillögu um að Noregur sækti um aðild að tollabandalagi Evrópusambandsins. Var sú tillaga felld með enn meiri mun, 91 atkvæði gegn sjö.
„Við þurfum nú að beina orkunni að því að standa vörð um norska hagsmuni. Ekki að eyða henni í langt, krefjandi umsóknarferli [að Evrópusambandinu] sem hætta er á að sundri okkur,“ sagði Jonas Gahr Støre, forsætisráðherra Noregs, í ræðu á landsfundi Verkamannaflokksins fyrir rúmu ári. „Við erfiðar aðstæður vil ég frekar halda Noregi sameinuðum en setja af stað ný átök með eða á móti,“ sagði Støre enn fremur. Orku Norðmanna væri betur varið í það að verja hagsmuni Noregs en langt, krefjandi og sundrandi umsóknarferli. „Þetta er mitt mat þó ég sé hlynntur inngöngu í Evrópusambandið.“
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Norski fáninn. Eigandi: Bjørn Erik Pedersen – Attribution 4.0 International)