„Hvað myndi þetta þýða fyrir húsnæðislánið mitt? Hvað myndi þetta þýða fyrir verð á matarkörfunni?“ spyr Þorbjörg Sigríður Gunnlaugsdóttir, dómsmálaráðherra Viðreisnar, í myndskeiði flokksins á Facebook þar sem hún kallar eftir því að hafið verði á ný umsóknarferli að Evrópusambandinu til þess meðal annars að fá svör við þessum spurningum. Heldur ráðherrann virkilega að eitthvað verði um vexti, verðbólgu og matvælaverð á Íslandi í samningi um inngöngu í sambandið?
Vitanlega ekki enda hvorki viðfangsefni viðræðna um inngöngu í Evrópusambandið né eitthvað sem hægt er að vita fyrirfram. Í báðum tilfellum kæmi það einfaldlega í ljós eftir að inn í sambandið væri komið. Hér er á ferðinni dæmi um upplýsingaóreiðu sem getur ekki verið annað en vísvitandi. Þorbjörg á enda auðvitað að vita betur. Fyrir vikið er ekki hægt að draga aðra ályktun en þá að með þessu útspili sé ráðherrann með vilja að nýta sér pólitískt erfiðleika margra landsmanna.
Viðræður um inngöngu ríkja í Evrópusambandið snúast um aðlögun þeirra á regluverki þess. Ekki vaxtastig og matvælaverð í framtíðinni. „Upptaka og innleiðing regluverksins er grundvöllur viðræðnanna. […] Hversu hratt viðræðurnar ganga fyrir sig fer eftir því hversu fljótt hvert ríki kemur á umbótum og aðlagast regluverki sambandsins. […] Markmið viðræðnanna er að umsóknarríkið taki upp regluverkið eins og það leggur sig,“ segir þannig til dæmis á vef sambandsins.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Þorbjörg Sigríður Gunnlaugsdóttir dómsmálaráðherra. Eigandi: Skjáskot af Ruv.is)