Helzta röksemd Evrópusambandssinna gegn krónunni hefur lengi verið sú að hún sé óstöðugur gjaldmiðill og sveiflist mikið gagnvart öðrum gjaldmiðlum. Hins vegar hefur raunin þvert á móti verið sú undanfarin ár að gengi krónunnar hefur verið stöðugara en gengi ófárra annarra gjaldmiðla. Þar á meðal bæði dollarans og evrunnar.
Margoft hefur verið bent á þetta undanfarin ár. Til að mynda minntist Jón Bjarki Bentsson, aðalhagfræðingur Íslandsbanka, á þessa staðreynd í samtali við Vísi í byrjun marz þar sem hann benti á það að síðust sex árin hefði krónan sveiflast minna en ýmsir aðrir gjaldmiðlar og þar á meðal, sem fyrr segir, bæði dollarinn, evran og pundið.
„Krónan hefur verið glettilega stöðug og sveiflast minna en ýmsir aðrir gjaldmiðlar undanfarið. Það hefur verið sérstaklega athyglisvert að fylgjast með því síðustu sex árin,“ sagði Jón Bjarki enn fremur. Verðbólgan hefði því ekki mikið haft með krónuna að gera og hún sinnt vel hlutverki fljótandi gjaldmiðils sem mýkti hagsveiflur.
Fjallað var nú síðast um málið á Innherja þar sem ritstjórinn Hörður Ægisson benti á það að gengisflökt krónunnar gagnvart evrunni hefði verið minna síðustu sex mánuði en dollarans, norsku, sænsku og dönsku krónunnar. Tal Evrópusambandssinna um óstöðugleika krónunnar er með öðrum orðum einfaldlega reist á gömlum gögnum.
Fullyrðingar í pantaðri skýrslu fjögurra erlendra sérfræðinga fyrir fjármálaráðuneytið um krónuna sem birt var nýverið, um að hún hefði ekki virkað sveiflujafnandi heldur þvert á móti, miðast við eldri upplýsingar frá því í hruninu og fyrir það eins og Seðlabankinn hefur bent á. Ekki þróun undanfarinna ára og breytt verklag bankans.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Íslenzkir peningar. Eigandi: Hjörtur J. Guðmundsson)