Miðað við niðurstöður nýrrar skoðanakönnunar Maskínu fyrir DV eru 44,5% hlynnt því að hefja á ný aðildarviðræður við Evrópusambandið en 39,4% því andvíg. Staðan er ekki ósvipuð og hún var í marz þegar fyrirtækið kannaði afstöðu fólks til aðildarviðræðna fyrir utanríkisráðuneytið en þá voru 42,1% hlynnt aðildarviðræðum en 38,8% andvíg. Báðar fylkingar bæta við sig fylgi á kostnað þeirra sem taka ekki afstöðu en þeir sem hlynntir eru talsvert meiru.
Hins vegar var einnig spurt í sama spurningavagni Maskínu um afstöðuna til inngöngu í Evrópusambandið en þær niðurstöður hafa ekki verið birtar. Hvort sem sú spurning var á vegum DV eða ekki. Í könnuninni fyrir utanríkisráðuneytið í marz voru aðspurðir einning inntir eftir því hvort þeir vildu ganga í sambandið og reyndust þá 46% andvíg því en 31% hlynnt. Slíkar kannanir hafa verið gerðar af Maskínu síðan en niðurstöðurnar hins vegar ekki verið birtar.
Væntanlega hafa þær kannanir verið gerðar fyrir kaupendur hlynnta inngöngu í Evrópusambandið en þeir ráða því eðlilega hvort þeir birti niðurstöðurnar. Hins vegar segir það sig sjálft að ef niðurstöðurnar eru ekki birtar hafa þær væntanlega ekki verið kaupendunum að skapi. Munurinn á könnunum bendir annars til þess að nokkuð stór hópur hafi í hyggju að samþykkja aðildarviðræður einungis til þess að geta síðan hafnað samningi um inngöngu í sambandið.
Mikilvægt er hins vegar að hafa í huga í því sambandi að þjóðaratkvæðið í lok ágúst snýst um það hvort hefja eigi inngöngu í Evrópusambandið eða ekki. Sú aðlögun sem sambandið gerir kröfu um samhliða viðræðunum átti sér áður fyrr stað eftir að ríki gengu í það en var síðan færð fram fyrir formlega inngöngu eftir að farið var að horfa til ríkja í Austur-Evrópu. Aðlögunin er þannig hluti af inngöngunni og væri orðinn hlutur þegar loks yrði kosið um samninginn.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Fáni Evrópusambandsins. Eigandi: Hjörtur J. Guðmundsson)