Meira rússneskt gas var flutt inn til Evrópusambandsins á fyrsta ársfjórðungi þessa árs en á síðasta ári. Fara þarf aftur til ársins 2022, árið sem rússneski herinn réðist inn í Úkraínu, til þess að finna meiri innflutning á fyrsta ársfjórðungi. Þetta kemur fram á fréttavefnum Euractiv. Komið hefur fram að frá innrásinni hafi sambandið greitt meira fyrir rússneskt jarðefnaeldsneyti en í fjárhagsaðstoð til Úkraínumanna vegna hennar. Þá hafa forystumenn Evrópusambandsins viðurkennt að sambandið hafi með miklum kaupum á jarðefnaeldsneyti frá Rússlandi í áratugi beinlínis fjármagnað hernað landsins.
Vísað er í fréttinni til rannsóknar hugveitunnar Institute for Energy Economics and Financial Analysis þar sem kemur fram að 16% meira gas hafi verið flutt inn til sambandsins á fyrsta ársfjórðungi þess árs en síðasta árs. Fyrst og fremst í fljótandi formi með flutningaskipum. Til stendur að banna innflutning á rússnesku gasi til Evrópusambandsins í byrjun næsta árs. Fimm árum eftir innrásina, Áður stóð það til ári síðar en vegna þrýstings frá stjórnvöldum í Bandaríkjunum var því flýtt. Hins vegar hafa ríki innan sambandsins fyrir vikið reynt að kaupa sem mest af rússnesku gasi fyrir gildistöku bannsins.
Fram kemur í fréttinni að einkum sé um að ræða Frakkland, Spán og Belgíu. Deilurnar í Miðausturlöndum á milli Írans og Bandaríkjanna hafi aukið enn á kaupin. Þróunin hafi haldið áfram í apríl og hafi aukingin í mánuðinum verið 17% miðað við apríl í fyrra. Hins vegar hafi ríki Evrópusambandsins á sama tíma aukið kaup sín á fljótandi gasi frá Bandaríkjunum. Þannig hafi þau aukizt um 27% á fyrsta ársfjórðungi ársins. þá hafi kaupin þrefaldast á árunum 2021 til 2025. Varað hefur verið við því að í staðinn fyrir að vera háð rússnesku gasi sé sambandið orðið háð dýrara gasi frá Bandaríkjunum.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Rússneskur heiðursvörður í Moskvu, höfuðborg Rússlands. Eigandi: Bandaríski flugherinn)