„Við erum eitt þeirra landa sem skilja fiskveiðarnar einna best, þarfirnar og mögulegan ávinning. Ef þið ákveðið að lokum að ganga í sambandið þá verðum við samstarfsaðilar, sérstaklega hvað fiskveiðarnar varðar,“ sagði José Manuel Albares, utanríkisráðherra Spánar, í samtali við Vísi 23. júní síðastliðinn þar sem hann reyndi að sannfæra landsmenn um að við þyrftum alls ekkert að óttast spænska fiskveiðiflotann kæmi til þess að Ísland gengi í Evrópusambandið.
Mögulegan ávinning af fiskveiðum og samstarfsaðilar sérstaklega í þeim efnum. Rifja má upp að stjórnvöld á Spáni því yfir að þau myndu gera kröfu um það að komast í fiskimið Íslands í umsóknarferli landsins að Evrópusambandinu á sínum tíma rétt eins og norsk fiskimið þegar Norðmenn sóttu síðast um inngöngu í sambandið á 10. áratug síðustu aldar. Þá kom fram í erlendum fjölmiðlum þegar ferlið var í gangi síðast að spænskar útgerðir sæktust mjög eftir því.
Til þess að ný ríki geti gengið í Evrópusambandið þarf samþykki allra ríkja þess. Innganga Íslands í sambandið er því háð því að Spánverjar og aðrar fiskveiðiþjóðir innan þess verði sáttar við fyrirkomulag sjávarútvegsmála í mögulegum samningi um inngönguna komi til hans. Til að mynda hafa hagsmunasamtök írskra sjómanna þegar lýst því yfir að þau muni ekki sætta sig við það að Íslendingar sitji einir að fiskimiðunum í kringum landið gangi Ísland í Evrópusambandið.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: José Manuel Albares, utanríkisráðherra Spánar. Eigandi: Sicherheitskonferenz – Attribution 4.0 International)