Fjallað var um það fyrr á árinu að innan Evrópusambandsins væru uppi hugmyndir um að ríki sem gengju þar inn hefðu fyrstu árin ekki neitunarvald í þeim málum þar sem einróma samþykki er enn til staðar. Einróma samþykki var eitt sinn reglan innan sambandsins en heyrir í seinni tíð til undantekninga og nær til að mynda hvorki til orku- né sjávarútvegsmála.
Málinu voru gerð skil í frétt á mbl.is og brást Margrét Einarsdóttir lagaprófessor við með því að saka miðilinn um falsfrétt í færslu á Facebook. Henni var þá bent á að fréttin væri unnin upp úr fréttum brezka dagblaðsins Guardian. Þá hélt hún því fram fullum fetum að slíkt myndi ekki ná til Íslands heldur einungis Austur-Evrópuríkja á skjön við efni fréttarinnar.
Haft var hins vegar eftir Þorgerði Katrínu Gunnarsdóttur utanríkisráðherra í samtali við fréttavefinn Euractiv nýverið að hún varaði Evrópusambandið við því að setja slík skilyrði varðandi ný ríki enda yrði það aðeins til þess að draga úr áhuga á því að ganga í sambandið. Skilyrðin myndu enda, næðu þau fram að ganga, sömuleiðis eiga við um Ísland innan þess.
Fram kemur annars í umfjöllun Euractiv að tekin hafi verið ákvörðun um það af hálfu Evrópusambandsins að fresta umfjöllun á vettvangi þess um ný skilyrði fyrir ríki sem vilja ganga í sambandið þar til í september til þess að forðast það að „ágreiningur“ yrði um málið í kosningabaráttunni í aðdraganda þessi. Með öðrum orðum að það drægi ekki úr líkunum á já-i.
Hjörtur J. Guðmundsson
sagnfræðingur og alþjóðastjórnmálafræðingur
(Ljósmynd: Höfuðstöðvar ríkisstjórnar Evrópusambandsins í Brussel. Eigandi: Sébastien Bertrand – Creative Commons Attribution 2.0 Generic)